Apr,17瘋狂玩盡泰國之旅-day 1

陽光...我來了.....11-4-2017

 

經過左差不多半年時間既籌備,終於等到呢一日啦.......我最愛的泰國,我們來了^^呢一次13日既旅程,除左必定跟隊的耆英們之外,仲有2位年青的新力軍加入我地,實行要跟我地玩轉泰國.....

 

11-apr 2017,我們一行8人,向泰國出發,開始了我們13日的瘋狂泰國之旅。

開開心心的上機

今次我地坐泰航,我貪佢夠準時,甚少delay,7:45am起飛,我地7:30am先跑到去登機,又係趕到乜咁😥鬼咩....個個又要食早餐又要shopping又要食煙=.=跑左一輪,總算順利上左機啦。

一落機就發生了可惡的不幸

我地係呢度向全世界公開泰國機場黑暗既一面

 

當日我地如常係香港duty free買煙帶過泰國,每人限帶一條煙,我地一共買左6條煙。當時我比左5毫子買左一個duty free膠袋裝住哂6條煙,而香港duty free職員亦只登記我一個人既boarding pass,出左一張收據。我地如常上機如常落機如常過關,當我地推住哂d行李過哂泰國海關,已經去到true move排隊買電話卡,而我媽媽就企埋一邊睇住d行李,而果袋裝住煙的duty free膠袋就係架行李車上面。突然有2個著制服既人走埋黎欄住我媽媽話要檢查行李(重點係我地已經過哂海關了),我地又身無屎,就一行咁多個人一齊走去陪我媽媽被查。

一入到房就收左我媽媽既passport,佢地話我地一個膠袋裝6條煙係犯法要罰錢,每人只可帶一條煙入境,我話我地一行人都唔止6個人,我地無超額,佢就同我講香港法律每人限帶19支,我同佢爭論,佢地所講既野根本完全唔合理,一開始我同佢講泰文佢就同我講英文,我轉台同佢地講英文佢就講普通話,我同返佢地講普通話佢地就唔講野,拎本完全一個英文字母都無既泰文書比我睇話係佢地法律,我話要打電話比我泰國家人佢地話唔比我打電話....吓....我係犯人呀宜家?😠

之後佢地又話要睇我張買煙收據,睇下我d煙係咪合法得黎既,好啦...到我拎張duty free收據出黎,佢地又話點解我張收據6條煙都係我一個人名下登記,足以証明係一個人超額帶左6條煙,我反駁:香港duty free職員點樣登記出收據又關我事,如果咁樣唔合法即係果個duty free職員犯法啫,關我咩事?泰國政府仲乜唔命令香港duty free要每一個人分一張單呀?😠

 

唔夠我拗佢地又咬返住話我地一個膠袋裝6條煙,我再反駁:d野係我既,你地理得我點裝呢?我鍾意將條底褲著上個頭度難道都要佢地管?😠

我話打電話又唔比我打,我話佢地咁樣老屈我要報警或搵領事館,佢地又唔比,一直keep住我媽媽的passport唔肯比返我地,係都要我地比錢,最後我話passport都唔要啦佢地就話要帶我地上法庭,我大姨70幾歲了,怕搞大件事有麻煩就軟化叫我比錢算數,我當然條氣唔順啦,見佢地一聽到有人肯比錢就態度即時唔同哂,但見我企硬唔肯比既時候,佢地即刻好搞笑地同我好似街市買餸咁講價,話比個優惠我地唔罰我地6條錢29800匹,減收我地2條,只收4條共19800匹,吓.....乜法律都有得講價既咩???

到最後耆英們怕事,決定比錢算數啦,雖然我條氣唔順,我都要顧及我大姨年紀咁大,好....我地比錢送瘟神算數!

可惡既行為仲未完結,比哂錢佢地仲要沒收我地4條煙,仲要揀邊款煙黎收,全部只揀萬x路,其他平既就唔要,又係同我講佢地法律係咁😠我比左錢點解仲要沒收我d煙先?

最黑暗既就係,當我地平安出到去,上到車我打比我泰國的舅父話佢知呢件事,我舅父打電話去機場去搵果班人,竟然係全部一個都搵唔到架......

有好多人問我做乜唔追究,唉....你估我唔想咩?耆英又叫我唔好搞大件事果班人又搵唔返,咁我唯有算數囉...寧願公開呢件事,等其他旅客提防,希望唔好再有人比佢班衰人老屈仲好啦 

 

 

步出機場,登上豪華客van

內有少量粗口....請見諒

到酒店啦^^Salil Hotel Sukhumvit Soi 8

今次我地又係黎到BANGKOK住呢一間酒店,Salil Hotel Sukhumvit Soi 8 ,點解我咁鍾意住呢間酒店呢?咪就係鍾意佢地點就腳夠哂方便,價錢又夠實惠囉😋雖然佢唔係D咩大型酒店,但都好乾淨企理,服務又貼心,有電車仔接送住客進出大門口,就算步行出大馬路都只係5分鐘,一出路口就係BTS既NANA站,去大型商場TERMINAL 21都只係十幾分鐘,日頭去SHOPPING,夜晚去酒吧都好方便,LIKE爆佢呀!❤

 

 

房間預定:

https://www.agoda.com/zh-hk/salil-hotel-sukhumvit-soi-8/hotel/bangkok-th.html?_ga=1.151921854.604283864.1459696856

 

感覺溫馨的小房間

Salil Hotel Sukhumvit Soi 8 實境房間介紹

踢走不愉快的心情,上遊輪晚飯去

大姨成日都話想坐船仔睇風景,好啦....今次就BOOK個遊輪自助餐,滿足下耆英們的要求啦,等佢地可以一邊睇靚靚風景,一邊食晚餐啦❤

 

今次我地BOOK左呢架wonderful pearl cruise既自助餐,我之前都未食過架,不過上網睇過D評價話幾好,見佢又唔係太貴,3百幾蚊港幣一個人,有得食又有風景睇,所以就定黎試下囉。

只係我地無BOOK到專車接送,我地要自己搭BTS去到SURASAK站再轉船,之後再行一段大約十分鐘既路程先到登船點,帶住一班耆英的確有D趕....所以建議大家如果食呢個自助餐就BOOK埋專車接送(加30蚊港幣一位)或自己搭的士去(當然要預埋塞車時間啦)

參考行程:
●19:00 在River City大樓的璀璨明珠號遊輪櫃檯辦理登船手續登船。
●19:20 離開碼頭,開始夜遊之行,沿途將經過拉瑪一世大橋、鄭王廟、大皇宮、拉瑪八世大橋。
●20:00 欣賞泰式舞蹈,享用泰式料理為主、包含各國美食的自助晚餐,享受船上的娛樂節目。
●21:00 欣賞現場樂隊表演,你可以隨著音樂跳舞。
●21:30 回到River City的碼頭,結束遊覽之行。

 

預訂wonderful pearl cruise自助晚餐:

 https://www.hosotour.com/shop/%e7%92%80%e7%92%a8%e6%98%8e%e7%8f%a0%e8%99%9f%e9%81%8a%e8%88%b9%e8%87%aa%e5%8a%a9%e9%a4%90-wonderful-pearl-cruise/

LET'S GO....出發去船上晚餐^^

  • 船上多款美食

  • 耆英們食得滿意

  • 團友們食得滿足

泰版魚魚年糕^^CUTE

我們也來浪漫一下吧^3^

wonderful pearl cruise晚餐

遊輪飯後的一杯,55樓天台的餐廳酒吧~RED SKY

食飽飽後,我地將耆英送返酒店,之後又到我地年輕人出動既時候啦^^我地同埋團友相約左另一對老友記在曼谷聚會,揀左位於大家熟悉的 Central World 內 Centara Grand 酒店 55樓既RED SKY,雖然RED SKY位於價格較高既酒店裡面,但消費都唔算高,二百令匹一杯,同老友記們一邊欣賞曼谷夜景,一邊傾計.....真係幾好FEEL架❤

呢度唯一既缺點,就係太大風啦😙吹到個頭顛哂=.=女士們要注意下呢一點啦^^

另外,雖然佢地餐廳有DRESS CODE,但依我所見....無乜人理佢....HAHA,就算著短褲拖鞋都一樣照比入場,所以大家唔需要太擔心,著得整齊舒服就OK,我都唔建議著得太哩啡,唔好嘥左個靚景啦...係咪?😀Dress code applies: Smart Casual, no singlets, flie applies: Smart Casual, no singlets,l, no singlets, flips flops, sport shorts

 

RED SKY訂座:

http://www.centarahotelsresorts.com/redsky/

 

Centara Grand 酒店預訂:

https://www.agoda.com/zh-tw/centara-grand-at-central-world-hotel/hotel/bangkok-th.html?cid=1658048&setcookienew=1

 

居高臨下,飽覽曼谷靚絕的夜景

美景當前,我和老公也要來閃一閃

老友相聚,揀選的地方也要盡顯品味吧

RED SKY一聚

飲完幾杯,就結束我地第一日既行程,大家返酒店覺覺豬咯....ZzzZ...Zzzz.ZZ..zzz